Sigrún Pálsdóttir

Fleiri skíðadagar

Sigrún — Thu, 05 Feb 2009 17:12:44 +0000

Í gær var flott veður hér og við fórum Sella Ronda. Það var heldur dimmara yfir í dag en fínt skíðafæri. Hér eru tvær myndir frá gærdeginum.

Skíðaferð

Sigrún — Tue, 03 Feb 2009 21:06:28 +0000

Er í skíðaferð á Ítalíu í Selva Valgardena. Veðrið er fremur lítið spennandi en hér er engu að síður gott að vera. Það sést lítið í fallegu fjöllin hér og hér eru sýnishorn af útsýninu uppi í fjalli í dag.

Ritgerðasmíði mitt í efnahagslegu fárvirði

Sigrún — Wed, 08 Oct 2008 23:38:46 +0000

Ritgerðasmíði hefur verið mitt aðalviðfangsefni í frítímanum upp á síðkastið milli þess sem ég fylgist með fréttum. Ég skráði mig aftur í námskeið í HÍ. Mér féllust næstum hendur í fyrsta tíma þegar ég komst að því að ég ætti að skrifa ritgerðir. Í mínum huga hafði ég ekki skrifað ritgerð frá því ég var í menntaskóla. Hef þó skrifað skýrslur og margt annað, en ekki ritgerð. Ég lét mig þó hafa það og afrekaði eftir vinnu í dag að skila skrifunum sem vega þungt í lokaeinkunn í námskeiðinu. Þrátt fyrir að ég væri ekkert sérlega ánægð með uppskeruna, þá var ákveðnum áfanga náð. Þegar ég kom vestur í háskóla þá rann upp fyrir mér að ég hefði ekki hugmynd um hvar Gimli væri, en þangað átti ég að skila. Eftir nokkra umhugsun þá var ég ekki frá því að eitthvað ókunnuglegt hús væri nálægt Háskólatorginu. Fann dyr að byggingunni og komst inn. Kom ráðvillt inn í einhvers konar miðrými og hafði ekki hugmynd um hvert ég ætti að skila en sýndist ég þó vera á réttum stað. Þá sagði ungur maður sem sat þarna, lúgan er þarna og benti á bréfalúgu. Og þar með tókst mér að skila ritgerðinni á tilsettum tíma.

Áfangastaðir

Sigrún — Sun, 31 Aug 2008 22:06:21 +0000

Bleiksmýrardalur, Bleikur, Bleiksbúð, Landkot, Laugafell. Arnarstapi á Snæfellsnesi. Egilsstaðir, Kárahnjúkar, Borgarfjörður Eystri. Orkanger í Þrændalögum í Noregi. Drangsnes, Kaldbakshorn. Þetta voru áfangastaðir ágústmánaðar.

Tíminn flýgur

Sigrún — Thu, 31 Jul 2008 23:30:03 +0000

Júlí 2008 á enda og þetta er eina færslan í mánuðinum. Það hefur samt verið nóg um að vera. Afmæli í fjölskyldunni, ferðir í óðalssetrið á Strandir og fleira. Hér eru nokkrar myndir teknar í júlí mánuði.

Capileira - nokkrar myndir

Sigrún — Tue, 24 Jun 2008 13:00:36 +0000

Þessi kona gekk um þorpið á hverjum degi og við dáðumst að henni, hún gat verið ættmóðirin í Capileira.

Kaffihús við torgið, takið eftir tveimur fullorðnum fyrir framan

Kirkjan í þorpinu.

Götumyndir

Á suður Spáni

Sigrún — Mon, 23 Jun 2008 16:05:16 +0000

Hef síðustu daga verið í Capileira, litlu spönsku fjallaþorpi. Það var stundum eins og að vera áhorfandi að gamalli bíómynd eða málverki. Hvít hús, þröngar, brattar götur og gamlar svartklæddar konur gengu þar um. Nú erum við komin til Granada. Hér er ansi heitt.

Stutt ferðalag til Noregs

Sigrún — Mon, 16 Jun 2008 21:04:01 +0000

Í gærmorgun lagði ég af stað í stutt ferðalag til Noregs. Vaknaði um hálfsex á sunnudagsmorgni, keyrði til Keflavíkur, flaug til Osló og svo áfram til Florø í vestur Noregi. Þar var búið að panta bílaleigubíl en hann var ekki til reiðu og allt lokað. En einn ágætis maður sem vann fyrir aðra leigu bjargaði bíl fyrir okkur. Þaðan tók við bílferð til Svelgen. Vorum komin þangað um hálfníu að staðartíma. Klukkan sjö í morgun vorum við búin að mæla okkur mót í Elkem Bremanger verksmiðjunni. Dagurinn var góður og árangur í samræmi við væntingar. Klukkan fjögur var aftur ekið á flugvöllinn. Ég þurfti að bíða nokkuð eftir mínu flugi, en vinnufélagi minn átti flug fyrr. Var svo að koma á hótelið stutt frá Gardermoen flugvellinum, en klukkan er að nálgast ellefu að norskum tíma. Kem svo heim á morgun um hádegisbilið á lýðveldisdaginn sautjánda júní. Eins og heyra má af þessu, langt ferðalag fyrir einn vinnudag en í þetta skipti var það vel þess virði. Að lokum fylgja hér tvær myndir frá Bremanger verksmiðjunni, tekið utan lóðar á bílastæðinu á móti verksmiðjunni.

Hér er krækja í fyrri skrif með mynd frá Bremanger.

Gangbrautarvörður í 100 km hlaupi

Sigrún — Sun, 08 Jun 2008 13:29:48 +0000

Í gær var ég mætt fyrir klukkan sjö að morgni inn við Elliðaár, nánar tiltekið við hringtorgið rétt hjá gömlu brúnni. Klukkan sjö var ræst í fyrsta 100 km hlaup á Íslandi. Hlaupið var 10 x 10 km, en leiðin lá um Bryggjuhverfi, Elliðaárdal og Fossvogsdal. Hver hlaupari þurfi að fara 20 sinnum yfir götuna þar sem ég var gangbrautarvörður. Ég var þarna samtals í fimm tíma í tveimur lotum. Það ágætt veður fyrri lotuna, en blés nokkuð, svo fór að rigna og það rigndi látlaust. Eftir fyrri lotuna fór ég heim og bjó mig betur, fór m.a. í ullarbol og regnbuxur en það veitti ekki af. Það er skemmst frá því að segja að þetta var skemmtileg upplifun. Bæði að fylgjast með hlaupurnum, en það voru 16 þátttakendur, og að sjá um að þeir þyrftu ekki að hafa áhyggjur af bílunum. Það sem mest kom mér á óvart var hversu kurteisir og þolinmóðir langflestir bílstjórarnir voru. Það var lítið viðvörunarskilti um hlaupið við gatnamótin. Það voru örfáir frekir og ókurteisir bílstjórar. Tveir keyrðu alveg upp að mér, eins og til að sýna vald sitt eða gefa til kynna að þeim fyndist ég ganga of langt, veit ekki. Örfáir flautuðu þegar þeir lentu á eftir bílum sem hægðu á sér eða stoppðu. Já, bílstjórarnir eiga hrós skilið, eiginlega alveg öfugt við það sem ég bjóst við fyrirfram. Á tímabili fékk ég félgasskap af þremur mótorhljólalöggum. Eftir nokkra viðdvöl sáu þeir að verkefnið var einfalt, einn gangbrautarvörður dugði, og sneru sér að öðrum verkefnum.

Af hlaupurunum er það að segja að þeir luku allir hlaupinu. Breti var fyrstur í mark og Dani annar, báðir ótrúlega léttir á sér. Bretinn var tæpa átta tíma og Daninn rétt rúma átta tíma. Ég fylgdist með þeim koma í mark og það var ekki að sjá á þeim að þeir væru búnir að hlaupa 100 km á 8 tímum og þar af rigndi stanslaust í síðustu fimm tímana.

Myndir frá hlaupinu, sú efri er tekin í byrjun hlaups á stöðinni minni, hin sýnir Bretann rétt ókominn í mark en hann er annar frá vinstri.

Kárahnjúkar

Sigrún — Wed, 14 May 2008 23:49:53 +0000

Er nú á Egilsstöðum og á leið til Reyðarfjarðar á morgun í hópi vinnufélaga. Í dag skoðuðum við Kárahnjúkavirkjun í boði Landsvirkjunar, en það var afar vel tekið á móti okkur. Einstaklega skemmtileg ferð í góðu veðri. Hér eru sýnishorn.